Leioako Basaki taldeak egin du Trapagaranen ospatuko den jaialdiaren kantua.
2012ko Ibilaldiaren kantua eta leloak aurkeztu dituzte gaur goizean. Leioako Basaki taldeak egin du "Maiatzean Meatzean" kanta eta "Ibipuntuzero" izango da jaialdiaren lelo nagusia. Hala ere, oraindik ez dago zehaztuta zein egunetan ospatuko den Ibilaldia. Maiatzaren 27an egitekoak ziren, baina Athleticek Kopako finala jokatu duenez 25ean bilera bat egingo dute antolatzaileek zein egunetan antolatzen duten erabakitzeko.
Gaurko agerraldian azaldu dutenez, "Ibipuntuzero" leloa aukeratu dute Trapagarango Itxaropena ikastolako kideek "internet zaleen" artean hain hedatuta dagoen 2.0-ari erreferentzia eginez.
Horrekin batera, "Ibiltxo" izeneko lagun berria aurkeztu dute. Azaldu dutenez, lurralde ezezagun batean jaioa da eta Trapagarango ikastolara iritsi da euskara ikasteko "leku ona" dela uste duelako.
Abestiari dagokionez, lehiaketa bat jarri zutela martxan gogoratu dute eta Leioako Basaki taldearen kantua aukeratua izan 25 talderen artean. Itxaropena ikastolako ikasle ohia izandako Ion Barrokalek idatzi ditu hitzak eta bideoklipa ere Jon Cortegoso ikasle ohiak egin duela azaldu dute.
