Nafarroaren konkistaren 500. urteurrenak eta Gernikako
bonbardaketaren 75.enak bat egin dute aurten, eta urtea hasi aurretik adierazi
genuen horrek izaera berezia ematen ziola 2012ari eta, horretaz baliatuz,
independentziaren aldeko urrats berriak emateko aukerak eskaintzen zituela.
Aberri Egunaren arrakasta ere
horren adierazle izan zen. Nabarmena da independentziaren gaiak lortu duen
garrantzia eta ikusgarritasuna Euskal Herrian
nahiz nazioarteko esparruan.
Euskal Herria mailan 2012ak
duen esanahi garrantzitsuaz gain, independentziaren aldeko haizeak iritsi
zaizkigu kanpotik ere. Eskoziako prozesuak
hankaz
gora jarri ditu independentziaren aurka entzun izan ditugun argudio asko. Europan
bertan, eta gaur egun, independentzia bideragarria dela adierazten du eta
erreferentzia berriak finkatzen ditu estaturik gabeko nazioentzat. Quebeceko hauteskundeetako emaitzek ere,
independentziaren aldeko indarren aktibazioaren berri eman digute. Azkenik,
Kataluniako Diadako mobilizazio erraldoiak lurrikara handia sortu du espainiar
estatuan eta izugarrizko oihartzuna Euskal Herrian eta mundu osoan; eta eztabaida
politikoaren erdi-erdian jarri du independentzia.
Bestetik, egoera ekonomiko larriak areagotu egin du
gure herriaren etorkizunari buruzko eztabaida eta independentziaren aukera gero
eta indar handiagoa hartzen ari da etorkizuneko alternatiba erreal moduan, eta
gero eta euskal herritar gehiagorentzat euskal estatu propioa, bideragarri eta
komenigarria izateaz gain, guztiz premiazkoa da.
Gauzak honela, nabarmena da aspaldiko baldintzarik
onenak daudela independentziaren aldeko lana biderkatzeko eta, ildo horretatik,
urtea bukatu baino lehen, ekimen zabal eta parte-hartzailea burutu nahi dugu.
Abenduaren 6an “Egun Berdea” antolatuko dugu Durangon
eta, egun osoko egitaraua izango duen ekimenaren barnean, independentziaren
aldeko Martxa Berdea egingo da arratsaldean herriko kaleetan zehar, ”BAGOAZ. Euskal Herriak independentzia”
lemarekin.
Gaur, kultura eta euskara alorreko lagunak dira, batez
ere, lehen urratsa eman dutenak agerraldi honekin, baina abendua bitartean alor
guztietan bultzatu nahi ditugu atxekipenak, euskal jendartearen oinarri zabala
bilaka dadin ekimenaren deitzaile eta protagonista.
Beraz,
herritar guztiei egiten diegu bere atxekipena adierazteko deia, ondorengo
helbide elektronikoa erabiliz: www.abenduak6.bagoaz.net
Euskal Herria,
2012ko urriaren 12a
INDEPENDENTISTAK
Sarea
